በኢትዮጵያ ልማት ባንክ አዳራሽ ጥር 18 ቀን 2004 ዓ.ም. የቦንድ ግዢው በተፈፀመበት ወቅት የሚድሮክ ኢትዮጵያ ቺፍ ኤግዚኪዩቲቭ ኦፊሠርና የዕርዳታ አሠባሳቢው ኮሚቴ ሰብሳቢ ዶ/ር አረጋ ይርዳው የቦንዱ ግዢ ሀገሪቱ በተለያዩ ዘርፎች ለምታከናውነው ልማት ዋና አንቀሳቃሽ ለሆነው የኃይል ማመንጫ ግንባታ የሚውል በመሆኑ የዜግነት ግዴታችንን የመወጣታችን አንዱ አካል ነው ብለዋል፡፡

ዶ/ር አረጋ ቀደም ሲል ሼክ ሙሐመድ ሁሴን አሊ አል-አሙዲ በድርጅቶቻቸውና በቤተሰቦቻቸው ስም የ1 ነጥብ 5 ቢሊዮን ብር ቦንድ መግዛታቸውን ጠቅሰው የየኩባንያዎቹ ሠራተኞች የራሳቸውን ድርሻ መወጣት ስላለባቸው የቦንዱ ግዢ መፈፀሙን ተናግረዋል።

የኢትዮጵያ ልማት ባንክ ፕሬዚዳንት አቶ ኢሳያስ ባህረ የ26 ሚሊዮን 158 ሺ 350 ብር ቼክ ከዶ/ር አረጋ እጅ በተቀበሉበት ወቅት እንደተናገሩት የሚድሮክ ኢትዮጵያ እህትማማች ኩባንያዎች በግንባር ቀደምትነት ግዙፍ የሆነውን የቦንድ ግዢ ማከናወናቸውና ለህዳሴው ግድብ ድጋፍ ማድረጋቸው ለልማቱ ሥራ የዜግነት ድርሻቸውን በዋናነት እየተወጡ ለመሆናቸው ምስክር ነው ብለዋል፡፡